2016年12月6日 星期二

如何能減少甩頭髮?

CLEAN SKINCARE小tips - 如何能減少甩頭髮?

近來咁流行韓國既風格,就連髮型都好想同佢地一樣,因為韓國風既髮型一般感覺都可以帶出一種自然凌亂美,髮量多而且有質感,加上望落重有好豐盈既效果,真係好靚.

但有時係髮型舖有聽到唔少人有頭髮稀疏或脫落既問題,搞到我都好似覺得自己頭髮真係比以往減少咗,所以就即刻揾相關既資料同問專業人士既意見,有左呢d資訊就梗係想分享比大家啦,如果你都想知道到底如何可以減少甩頭髮?咁就一直睇落去啦!

大部份既亞洲人每人約有十萬條頭髮,而西方人約有十五萬條左右,實際數量要取決於每個人頭皮既毛囊多少而定,而毛囊既密度亦會隨著年紀增長導致有減少既現象出現.

例如:童年既毛囊時期,如每平方公分(1cm2)大約係1000個,到咗青少年時期下跌到大約600個,最後成年時期變得剩餘300左右,而平均每人每日甩頭髮大約50-100條都係正常 ,只要毛囊健康未受損害,大部份都會再次生長.

聽落毛囊確實係會受到年紀影響而變得減少亦係自然既現象,但甩頭髮問題就愈來愈年輕化,除咗男性之外,連女性都變得普及.其實係我地對頭皮缺少咗一份照顧,因為頭皮屬於身體皮膚既之一,只不過比起其他皮膚地方有毛髮蓋過,如果受到細菌感染,壓力同埋內分泌失調一樣會造成頭皮發炎,導致甩頭髮問題.

如何能減少甩頭髮?應由清潔用品開始!因為頭髮產品係我地每日都用到既產品,所以會直接影響頭皮健康,所以:
  1. 首先要避免用過度滋潤既洗頭水產品,洗頭清潔用品主要用途係去除頭部多餘既油脂和細菌,而過於滋潤既洗頭水產品就做唔到清潔油脂和細菌既功能,仲會造成油脂積聚係毛囊中令細菌繁殖,導致頭皮發炎造成脫髮現象.
  2. 而護髮素既成份(特別係有矽成份)中容易殘留在頭皮上,容易堵塞毛囊令脂肪粒出現同埋產生脫髮問題,建議只搽係髮尾上並避開搽係頭皮裏.
  3. 如果發現有甩頭髮或髮質變幼既跡象,要及早選擇適合既防脫髮產品,部份防脫髮產品性質溫和,適合每日使用,作用可鞏固頭皮同埋頭髮既健康,假若唔立即正視的話,相信要花更長既時間護理先可解決到問題喇.
但其實除左產品會影響頭皮健康外,另外吸煙亦會導致頭皮毛細管收縮,阻礙頭髮既生長,所以應盡量減少吸煙.

總之身體內外既健康同樣重要,太長時間受到焦操不安既情緒困擾都會引起脫髮問題,應保持適當既運動量,令心境開朗,消除疲勞,多進食一D含鐵質,蛋白質同埋維生素E既食物(例如:天然既黑豆和黑芝麻食物等),都可幫助頭皮健康護理和皮膚問題哦・ 

免責聲明:以上所載的資料只供參考用途,均不能作為替代執業西醫的建議.在採取任何行動之前,你必須與有適當資格的執業醫療人仕諮詢.