2015年4月25日 星期六

點解已經搽左防晒啦都有出斑既?


Clean Skincare小知識

夏天快到啦…你地準備好未,準備好每日都要搽好防曬產品先出門口呀!

如果之前有留意開我地分享既朋友都會知道其實不論冬天,夏天,晴天,雨天,甚至陰天都要塗上防曬產品先出門口,因為紫外線真係無處不在,如果唔想加速皮膚老化又或者唔想d斑走晒出黎,咁我地就唔可以偷懒啦!搽防曬呢一步真係唔可以skip架~

最近有客人朋友講開搽得多化學性防曬產品係咪會對皮膚唔好,又話已經搽防晒啦都有出斑既,所以關於化學性防曬產品既疑問我地都想係呢到分享一下!

首先我地用最簡單既方式去理解化學性防曬(即係用化學性成份做出來既防曬產品),化學性防曬既原理係利用化學紫外光吸收劑進入皮膚,藉以吸收紫外線達到防曬既效果. 但係大多數既紫外光吸收劑都能夠全面吸收UVB,而 UVA就只能吸收少部分.但要知道 UVA係佔紫外光既98%,而UVA亦都係令皮膚曬黑和長斑既主要元凶,所以大家都疑惑點解搽防曬產品但係都繼續長d斑出黎呢,答案就係因為化學性防曬產品並未能有效地阻隔 UVA!

化學性防曬產品中最常見既化學成分包括有Octyl Dimethy PABA(對氨基苯甲酸鹽),Para Amino Benzoic Acid(PABA)(胺基安息香酸),Dioxybenzone (二苯甲酮),Oxybenzone(羥苯甲酮),Octyl Salicylate (水楊酸鹽類)等等,通常還會加入其他化學成分,令調配出來既防曬乳質地較透薄自然,少有泛白既情况出現,而成份中既紫外光吸收劑本身係會對皮膚造成一定既負擔同威脅, 最大既弱點就係刺激性大,有不少實例指出可能引致皮膚紅腫和痕癢等過敏反應.

化學性防曬劑本身既複雜成份在清潔方面如只用一般既洗面產品係無辦法卸得乾淨,建議大家在清潔方面要先用上卸妝產品溶解化學性防曬劑,之後再用潔面產品作第二次清潔,我地需要每日清潔乾淨皮膚避免任何化學成份殘留在皮膚上,讓皮膚減輕負擔.

如果防曬成份長期留於皮膚裏會有以下皮膚問題:
  1. 影響皮膚油脂分泌而失去平衡,油脂唔能夠正常排出,毛孔會變得粗大.
  2. 皮膚呼吸困難會影響新陳代謝,容易産生膚色臘黃和暗啞,或長出斑點等情況.
  3. 減慢角質層既代謝而使之變厚,皮膚慢慢會有出現粉刺和暗瘡等問題.
  4. 皮膚變得乾燥,容易發紅,脫皮等問題.
  5. 皮膚變得痕癢和有敏感既情況出現.
所以大家在選擇防曬產品時應放棄用化學性防曬產品而採用物理性防曬產品,物理性防曬既原理是在皮膚表面加左一層保護膜而不會進入皮膚裏,原理係先保護皮膚然後讓紫外線反射出去.常見成份有紫外光反射劑 Titanium Dioxide 及 Zinc Oxide,以上兩種成份係目前美國FDA和歐盟獲批准既防曬劑成份,可以全面阻隔 UVA 及 UVB,性質溫和又可以保護皮膚.

結論係化學性防曬產品裏既化學成份會直接影響到我地既皮膚質素,希望今次既分享可以幫助大家了解更多關於化學性防曬產品,如果大家都想擁有健康既皮膚就要由選對防曬產品呢一步開始啦~